Акан 25-мӗшӗнче кашнии ҫулах Чӑваш чӗлхи кунне уявлатпӑр. Вӑл Иван Яковлев ҫуралнӑ кунпа тӳр килет. Ҫак ятпа пирӗн шкулта сахал мар ӗҫ пулса иртрӗ. Р.Г.Кочетова, М.А. Семенова, Е.М.Яндрова педагогсем уроксенче тӗрлӗ ӑслайпа мел усӑ курса калаҫусем, конкурссем, вӑйӑсем йӗркелерӗҫ. Сӑмахран, иккӗмӗш класра вӗренекенсем Иван Яковлевӑн «Утӑра» калавӗ тӑрӑх викторинӑна хутшӑнчӗҫ, ҫиччӗмӗшсем вара «Чӑваш чӗлхи пӗлтерӗшӗ» темӑпа сочинени хайларӗҫ, чӑваш апат-ҫимӗҫӗ ҫинчен Яна Селянкина хатӗрленӗ презентаципе паллашрӗҫ. Тӑван ен историӗпе культури урокӗсенче чӑваш Прометейӗн кун-ҫулӗпе, ӗҫӗ-хӗлӗпе ҫыхӑннӑ видеофильм ачасене нумай ҫӗннине пӗлме май пачӗ. Иван Яковлевич биографийӗ тӑрӑх ҫырнӑ тест хуравӗсем пур вӗренекенӗн те «5» палла тивӗҫрӗҫ.
Чăваш Республикин вĕренÿ институтĕнче Чăваш чĕлхи кунне халалласа «Пĕтĕм чăваш диктанчĕ» акци иртрĕ. Диктант çырма пухăннă вĕрентекенсене, шкул ачисемпе колледжсен студенчĕсене, тĕрлĕ организаципе учреждени ĕçченĕсене Чăваш Республикин вĕренÿ институчĕн ректорĕ Юрий Исаев, этнокультура вĕрентĕвĕ кафедрин ертÿçи Анна Егорова, диктант тексчĕн авторĕ Владислав Николаев саламларĕç. Текста Вĕренÿ институчĕн регион аталанăвĕн центрĕн ертÿçи Инесса Ядранская вуларĕ. Диктант çыракансем чăваш театрĕпе кино актрисине, чăваш çыравçине, чăваш халăх культурин паллă ĕçченне — Тани Юна — халалланă хайлав кăсăклă пулнине палăртрĕç.
Ку яваплӑ ӗҫе пирӗн шкултан чӑваш чӗлхи вӗрентекен Елена Матвеевна Яндрова хутшӑнчӗ. Унӑн диктантне экспертсем «5» -пе хакларӗҫ.
Чӑваш чӗлхи кунӗ чӑннипех те тухӑҫлӑ тата усӑллӑ иртрӗ.